මරණයට වංචා කළ ජීවිතයේ විය නොහැක්ක

මුහුද තමන්ගේ බල පරාක්‍රමය ගැන වුවමණාවට වඩා ඉතා ඉහළින් තක්සේරු කර තිබුණි. සාමාන්‍ය මට්ටමින් දිය ‍රැළි පෙරළමින්,වෙරළට විත් මදක් නැවත,ඉදහිට උසැති දිය ‍රැල්ලක් නිමවා යළිත් දියඹට යන ලාස්‍ය ලීලාව අමතක කර තිබුණි. එදා මුහුද තාණ්ඩව සිරියක් ගෙන මහත් භයානක නැ‍ටුමකට ලෑස්තිව සිටියේ ඇයිදැයි කිසිවෙකු දැන සිටියේ නැත.
නත්තල් නිවාඩුව සංචාරකයන්ව නිදැල්ලේ පියාඹා යන පක්ෂීන් මෙන් මුහුදු රළ නඟන උන්මාදනීය වෙරළ වෙත කාන්දමකින් ඇද බැද තබා ගන්නට විය. තායිලන්තය සුපුරුදු හරිත කාලගුණය සමඟ නත්තල පිළිගන්නට සූදානම්ව සිටියේය. ඉනුත් 'කාවෝ ලැක්' හි ඕකිඩ් බීච් හෝටලය අලුත ගෙනා මනමාලියක් මෙන් පිබිදී සිටියේය.
මරියා-හෙන්රි යුවළ සහ පුතුන් තිදෙනා තායිලන්ත සුළඟ සමඟ සෙල්ලමින් පසු වූයේ මහත් ව්‍යසනයක පෙර නිමිත්තක් ගැන නම් නොදැනය. ජපානයේ සිට තායිලන්තය තෙක් ඔවුන් කැදවාගෙන ආ ප්‍රීතිය දිගු කළ මනරම් වෙරළ තීරය,තායිලන්තයට ආවේණික උඩුගුවනට යවන බකට්‍ටු,නත්තල් ගස යට සු‍රැකිව තිබූ ත්‍යාග විවර කරමින් ඔවුන් ලැබූ ආනන්දය තිගැස්වන්නේ නරඹන්නාවය. මෙතරම් ප්‍රීතියක් ! මෙතරම් ජීවී බවක් ඇති පවුලකට දිය ‍රැල්ලකට කුමක් නම් කළ හැකිද?
සිනමාපටයකට ඕනෑම දෙයක් කළ හැකිය. එහෙත් සත්‍ය කතාවකට ඕනෑම දෙයක් කළ නොහැක. මේ සත්‍ය කතාවකින් ඔතන ලද්දකි. 2012 වසරේ සැප්තැම්බර් 9 වැනිදා නිකුත් කරල ලද 'ද ඉම්පොසිබල්' ස්පාක්ඥක්ඥයේ නිපදවන ලද ඉංග්‍රීසි සිනමාපටයකි. ජේ.ඒ බයෝනා අධ්‍යක්ෂණය කළ සිනමාපටය නිෂ්පාදනයට තිදෙනෙකු හවුල්ව ඇත. ඇල්වාරෝ ඔගස්ටින්,බෙලන් ඇටි එන්සා සහ එන්රික් ලෝපස් ඒ තිදෙනායි. සිනමාපටය ඉපැයූ බොක්ස් ඔෆීස් ආදායම ඇමෙරිකානු ඩොලර් 171,680,664 කි.
එපමණක් නම් නොවේ,පසුගිය වසරේ ඔස්කාර් සම්මාන උළෙලේ හොඳම නිළිය ලෙස නිර්දේශ වීමටද 'ද ඉම්පොසිබල්'හි ප්‍රධාන නිළිය ලෙස රඟපෑ නයෝමි වොට්ස් සමත් විය. ගෝල්ඩන් ග්ලෝබ් සම්මාන උළෙලේද හොඳම නිළිය ලෙස ඈ නිර්දේශ විය.
ඉතින් මේ දිය ‍රැල්ලකට කළ හැකි දෙයයි. හදිසියේ කම්පිතව උමතුවෙන් මෙන් වෙරළට දිව එන්නට දිය ‍රැල්ලකට හැකිය. මරියා සහ හෙන්රි ඇතුළු පවුලේ සැම ඔසවා පොළේ ගසමින් ඕකිඩ් බීච් හෝටලයට දිව ආයේ ඒ උමතු ‍රැල්ලයි. ඉන්දියානු සාගරය විපරිත කරමින් ඇති කළ මහත් භූ කම්පනයේ අතුරු ප්‍රතිඵලය ඒ සුනාමියයි. සිනමාපටය සුනාමි රළ ප්‍රතිනිර්මාණය කරන ආකාරය ඉතාමත් ආකර්ශණීයය. මහත් නිහැඩියාවක තිබූ පරිසරය කණපිට හැරවෙන්නට මොහොතකට පෙර මරියා කියවමින් සිටි පොතේ කොළයක් ගැලැවී සුළඟ සමඟ ගසාගෙන යයි. කුරුල්ලන් විප්‍රකාර ශබ්ද නඟමින් ඉගිල යයි. ඈතින් මනහරව උසට උසේ හිටගෙන හුන් පොල්ගස්  බීමතින් මෙන් එකිනෙකා පෙරළගෙන බිම ඇද වැටෙයි. නාන තටාකයේ දිය කෙළිමින් සිටි සියල්ලෝම මොහොතකට ගල් වූවාක් මෙනි. තවත් අය හැඟීමකින් තොරව තමා වෙතට පෙ‍රැළෙන් උසැති පොල්ගස් දෙසම බලා හිදියි. අනපේක්ෂිත මොහොතක සාමාන්‍ය මිනිස් හැසිරීමෙන් යුක්තව සිටින මේ සියලු දෙනා අතර සිනමාපටයේ ප්‍රධාන චරිත කිහිපය මතු කරමින් කැමරාව හැසිරෙනු පෙනෙයි. සැකක් නැත. මහත් ව්‍යසනයකි.
මුහුද රකුසෙකු සේ හෝටලය වෙතට ගලා එන්නේ පොල් ගස් අසරණව බිම හෙළමිනි. අති ස්වාභාවික සුනාමි දිය ‍රැල්ලක මවා පෙන්වන සිනමාපටය රසිකයා එහි කලින්ම ගිල්වයි. හෝටලයේ කාමර තූ තූ කරමින් කඩා වදින රළ පවුලේ වැඩිමල් පිරිමි දරුවා වූ ලූකස්ව නාන තටාකයට හෙළයි. හෙන්රි අනෙක් කුඩාවුන් දෙදෙනාද සමඟ අනෙක් අන්තයෙන් නාන තටාකයට පනියි. මරියා විසාල වීදුරුවක් ඉදිරිපස ලූකස්ගේ නම කියමින් තමා කියවමින් උන් පොත පපුවට තුරුලු කර ගනී.
දැන් කිසිවක් නැත. තිරයේ කළු පසුබිමකි. ඔබට වුවමණා කම්පනය සිනමාපටය වුවමනාවත් වඩා ලබා දෙයි. මේ සා ව්‍යසනයකින් පසුව යමක් තිබිය හැකිද? දිගු නිහඩතාවයකි. දැන් ජලයේ ගිලෙන්නේ ප්‍රේක්ෂකයාය.
දුඹුරු පැහැති මහා ජල කඳක් මැද පොල් ගසක් බදාගෙන උදව් ඉල්ලා කෑ ගසන මරියාය. ඕ දකින්නේ ගිලෙමින්,යළි මතුවෙමින් දියේ ඇදී යන ලූකස්ය. මවුවත්කම් සියල්ල අභිබවයි. ඈ  තම පුත්‍රයා බේරගනු පිණිස සැඩ ජල කඳ මැදින් පිහිනයි. යළි ගිලෙයි. මතුවෙයි. තියුණු උලක් ඇගේ පපුව පසාරු කරවයි. ඕ ඒ නොතකයි. අවසන පුතු සමඟ පිහිනමින් දෙවැනි රළටත් මුහුණ දෙයි. ජීවතය උදෙසා ඔවුන් සටන් කරන්නට පටන් ගන්නේ ඉනික්බිතිවය. මරණයෙන් ඈතට පීනා යන පුත්‍රයත් මවත් තම තමන් කොපමණ තුවාල ලබා ඇත්දැයි වටහා ගන්නේ ගොඩබිමක් සොයා ඇවිදින අතරය. ලූකස්ගේ පිට දිගට රත්ව ඇදුණු පහරය. මරියාගේ එක් කකුලක් දරුණු ලෙස ඉරී වෙන්වී,පපුව මැද විසල් තුවාලයකි. ගසක් උඩ ගලවා ගන්නේත් රෝහලකට යොමු කරන්නේත් ගම්වැසියන්ය. මිනිසුන්ගේ කරුණාව මෙන්ම තුච්ඡ ගති සොබාව මතු කළ සුනාමි ව්‍යසනය ජීවිතයත් මරණයත් අතර ඇති කෙස් ගසක වෙනස යළිත් සිහි කරවයි.
සිනමාපටය සැබෑව ව්‍යාජයක් නොකොට පෙන්වීමෙන් නරඹන්නාට ලැබිය යුතු අසාමාන්‍ය කම්පනය ලැබෙයි. රෝහල එකම පිස්සන් කො‍ටුවකි. නොයෙකුත් භාෂාවන්ගෙන් කෑ මොර දෙන්නන් රාශියකි. මරියාගේ දෑස ගිනි රතු පැහැතිය. අත්පාවල සීරුම් තුවාල ව්‍යාජයක් නොවන්නට වේෂ නිරූපනය කර ඇති අයුර පැසසුම් ලැබිය යුතු මට්ටමේය. හදිසියේම ලූකස් වගකීම් දරන්නා බවට පත් වෙයි. තම මවගේ ඉල්ලීමෙන් ඔහු රෝහලේ තැන තැන වෙන්ව සිටින මිනිසුන්ගේ පවුල්වල සාමාජිකයන් මුණ ගැස්වීමට රෝහලේ තට්‍ටු පුරා දිව යයි. පුතෙකු හා පියෙකු මුණ ගස්වන ලූකස් තම මව සොයා එන විට ඈ සිටි ඇද මත කිසිවෙකු නැත.
සිනමාපටය නැවතත් අපට කම්පන ලබා දෙයි. විය හැකි දේ කොතරම් තිබිය හැකිද? මරණයෙන් ගැලවුණ මිනිසුන්,ගැහැනුන් හට අතරමඟදී මරණය මුණ ගැසිය නොහැකිද? සිනමාපටයක ඕනෑම දෙයක් විය හැකිය.
හෙන්රි හට තම කුඩා පුතුන් දෙන්නා හමු වෙන්නේත් ඔහු විසින් ඔවුන්ව ආරක්ෂිත කදු මුදුනකට යවා තම බිරිය සහ පුත්‍රයාව සොයා ඇවිදින්නේත් බලාපොරොත්තුවේ සියුම් ගිනි දැල් දැල්වෙනා හෙයිනි. ප්‍රේක්ෂකයා ඔසවා පොළොවේ ගසමින් යළිත් දියේ ගිල්වමින් ඔවුනොවුන් එකිනෙකා සොයා ඇවිදියි.
තම සොහොයුරාගේ කටහඬ පමණක් ඈතින් ඇසී යටිගිරියෙන් කෑ ගසමින් ඔහු වෙතට දිව එන කුඩා සොහොයුරන් දෙදෙනා හෘද සංවේදී රූප රාමුවක් බවට පත් වෙයි.
යළිත් කියමි. සිනමාපටයක ඕනෑම දෙයක් විය හැකිය. ජීවිතය නම් අභව්‍ය නාටකයේ නළුවන් වූ මේ පවුලේ සාමාජිකයන්ට කුමක් විය හැකිද?
මරියා ලෙස රඟන නයෝමි වොට්ස් මෙන්ම හෙන්රි ලෙස රඟන එවාන් මැක් ග්‍රෙගර් කුමන අන්තයකින් හමු වේද? ලූකස් ලෙස රංගනයෙන් සහය වූ ටොම් හොලන්ඩ් ‍තෝමස් නම් බාල සොහොයුරාට ‍රැඟූ සැමිවෙල් ජොස්ලින් සහ සයිමන් ලෙස ‍රැඟූ ඕක්ලී පෙන්ඩර්ගාස්ට් දෙදෙනා සමඟ මරියාව සොයා යාද?
ව්‍යසනයකට සතු‍ටුදායක අවසානයක් තිබිය නොහැකිද?
යළිත් අකාරුණික ලෙස කියමි.
සිනමාපටයකට ඕනෑම දෙයක් කළ හැකිය.

 

කාංචනා අමිලානි
පුවත්පත් සබැදිය

 

ප්‍රතිචාර

comments

Powered by Facebook Comments

Trackback URL

No Comments on "මරණයට වංචා කළ ජීවිතයේ විය නොහැක්ක"

Hi Stranger, leave a comment:

ALLOWED XHTML TAGS:

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Subscribe to Comments

Hit Counter provided by professional seo company
twitter-widget.com